!!حبة فهلوة

16 04 2010

نظرا لأن الشائعات كترت اليومين دول حوالين موضوع بناء الكنايس ، و تساءل المصريين عن السبب الحقيقي ورا اهتمام الاقباط بالمطالبة بقانون موحد لبناء دور العبادة. فالناس اهل العلم ..اححمم قصدي.. اهل الفتي و الفهلوة  طلعوا باسئلة و نظريات حوالين الموضوع دة. السؤال البديهي الاول أكيد كان: طب وهما عاوزين كنايس اكتر ليه؟ ما اللي عندهم كفاية (على اساس انهم بيدفعوا من جيوبهم في بنا الكنايس!!).. و طبعا السؤال ماتسابشي من غير اجابة. هما نفسهم تطوعوا و جاوبوا على السؤال بالفكاكة المصرية المعهودة

!!قالك ايه؟ اصل انت ماتعرفش.. الكنايس دي مخطط كبيرواحنا مش داريين بيه

مخطط؟؟ هي دي مش اماكن بيعبدوا فيها ربنا؟؟

..لا يا بابا اصلك لسة صغير و مش داريان باللي بيحصل

!!طب فهمني

بص يا سيدي.. الكنايس دي عاملة زي مراكز المخابرات. بتتبني من خراسانة مسلحة مافيش حاجة تعرف تخترقها. دة غير كمية السلاح المستخبية في سراديب. و كل الكنايس متوصلة بنظام اتصال مربوط بقمر صناعي و واصل على امريكا عدل!! أومال؟ مش بقولك مخطط كبير. دة غير الصلبان المجسمة المنورة اللي فوق الكنايس، دي بقى عشان يميزوا الكنايس عشان لو حصل ضرب بالطيران الكنايس ماتضربش

ياه كل دة؟؟

امال لو حكيتلك عن الاديرة اللي في اطراف المدن! دي معسكرات تدريب. و هناك بيربوا نمور و اسود، والرهبان بيرموا الناس اللي عاوزين يخلصوا منهم للاسود تاكلهم ولا من شاف ولا من دري

أتاريهم بقى عايزيين يكتروا الكنايس و التسليح و الحاجات دي عشان ينفذوا مخططهم

…مش قولتلك!! مخطط و كلام كبير