و بدأ الاستقطاب الطائفي

29 05 2012

من ساعة ما انتشرت حجة ان شفيق كسب بصوت الأقباط ، و لقيت ناس كتيرة ماشية على نفس الخط و الفايس بوك  اتملى صور  و كلام من دة عشان يحولوا الإعادة إلى غزوة صناديق تانية، كل واحد لازم يحمي دينه و مش مهم صالح البلد. بيتهايألي أن حجة الأقباط كسبوا شفيق تم الرد عليها من ناس كتير مسيحيين و مسلمين ، لكن الناس بتقرأ و تفهم اللي هي عايزاه بس.
المهم اني اتوقع يكون فيه استقطاب طائفي كتير الفترة اللي جاية، و أنا قررت ارصد كل المحاولات دي من الجانبين و انا من الأخر لا هرشح مرسي و لا شفيق فا مش فارقة معايا، الاتنين غم يالنسبة لى و  ها فضي نفسي للناس اللي بتولع في البلد، و ياريت كل واحد يشوف حاجة فييها لعب على الدين و الطائفية يبعتلي و انا هاعمل تحديث للمدونة بكل المحاولات من الجانبين، و لغاية دلوقتي هو دة اللي لقيته، ياريت بقى نكون واعيين و ما نسمحش بالفرقة تسيطر على الكل.